Geh aus mein Herz und suche Freud....!

Unser Stadtspion in Giengen unterwegs

Grüß Gott, liebe Leutla em Städtle ond dromrom!

Also ois woiß i gwieß: Es gibt nex auf dr Welt wo so sicher ond außer Zweifel isch wia onser Kenderfescht en Gienga! Do hats ja Gerüchte geba, ma wöll des nemme feira weil ma spara muaß. Jetzt frog i mi, was ma en de echte Notzeiten eigentlich gmacht hat - weil aufs Kenderfescht hat ma gar nia verzichtet. Koi Mensch wär auf eine solche Idee komma. Drom isch au jetzt recht, dass des Gschwätz rom isch.

Nadierlich send Sparmaßnahmen au am Fescht et spurlos vorbeiganga. Dia Kender beim Preistanzen laufat jetzt bloß no 9 mol statt 11 mol em Reng rom. Ma spart a weng an de Gschenker - ond de Stadträt wird em Tanzkreis au koi Fescht-Trank meh eigschenkt. Koi Bier meh ond net amol a Schorle. Wega dem Beischpiel. Ja, en Gotts Namen - wenns hilft!

Propper send onsre Johrgäng wieder aufgstellt. So ebbas fendsch ja au bloß en Giengen. Ab 40 kommet äll 10 Johr ond ab 60 sogar älle 5 Johr dia Klassenkamerädla ond Johrgängler zamma ond feirat, dass grad kracht. Ond des et bloß oimol sondern 3 Täg lang ond als Oktav no zom Schluss beim Kenderfescht auf am Berg!

Grad des isch ja au dr Grond, warom onser Kenderfescht eigentlich onser "Nationalfescht" isch. Wo Kender no Kender send ond wo Leut wieder wia Kender werdat. Do isch ällas vereint. Ond weil bei ons Kender emmer weniger werdat, laufat sogar Johrgäng jetzt au am Kender(!)-Feschtzug mit. So isch recht, zammahalta muaß ma! Ond weil's am Geld wia an große ond kloine Kender fürs Kenderfescht em Städtle no nia gfehlt hat - ond weil bei dr Stäffelespredigt sicher au wieder Tacheles gschwätzt wird - freut sich au heuer wieder ganz bsonders dr Stadtrat Jörg Ehrlinger als Euer

Karle Knitz von der Tanzlaube