Unser Stadtspion in Giengen unterwegs

Grüß Gott, liebe Leutla em Städtle ond dromrom!

Jetzt wisset mir des also ganz gwieß: Mir brauchet koin Fasching, koin Karneval ond koi Fasnacht, weil dia Narretei, wo ons em täglichen Leba begegnat, ka niemand überbieta. Do kommat Schulden auf Deutschland zua, wo ma dia Zahl von de Nullen garnemme mitzähla ka. Ond gleichzeitig schwätzat de gleiche Leut em fernen Berlin, ma könnt onsre Steuern absenka. I glaub allmählich, et bloß dia Milliarden bestehat aus Nullen sondern selle, wo drmit jonglierat. Grad schwindlig wird’s oim drbei ond ällas dreht sich ganz von selber em Kopf. Do brauchsch koi Viertele meh. Des klappt ganz von selber. Ond koscht nex.

Do kürzlich han i an meiner Tankstell gmoint, se sott doch von ihrer Lieferantenfirma, also oiner von dene Ölmulti, bei dr nächschten Preiserhöhung glei ein Apothekerschildle mitliefra lassa. Weil früher, wo ma en dr Marktgass da Benzin em Apothekerkännle kauft hat, isch grad erscht amol 100 Jährla her. Wohlgemerkt: Dia Leut von meiner Tankstell send freundlich, hilfsbereit ond nett. Dia hent nex drvo, außer Ärger mit dr Kundschaft. Den Reibach machat bloß selle bei de Ölmulti, wo wundersamerweise älle gleichzeitig am Preisschräuble drehat. Zu was mir dia Sesselfurzer em Bundeskartellamt eigentlich hent, woiß koi Mensch. Dia merkat des ja au net, wenn dia Strom- Mafia wieder amol gleichzeitig da Zähler naufstellt. Eigentlich ghört so a Behörde als „Narrenhochburg“ jetzt en dr närrischa Zeit ins Fernseha ond anschließend am Aschermittwoch „zu Grabe getragen“. Heula dät koi Mensch. Aber wie gsait: “Hoffen und Harren macht manchen zum Narren“. Ond deshalb hoff i au net auf Ostern, weil mir do garantiert wieder das Wunder der gleichzeitigen Benzinpreiserhöhung erlebat. Ond bittschön net da Tankwart schimpfa, weil wenn em Städtle dr Preis gmacht werden könnt, däts dr Gmoidrat. Ond weil der ja bekanntlich spart daß es kracht dät er sicher ganz einhornmäßig des Preisschräuble nach noner dreha. Moint als allzeit Gutgläubiger ond Mittrauernder au mit seim oigena „heiliga Blechle“
dr Stadtrat Jörg Ehrlinger als

Euer Karle Knitz von der Tanzlaube