Donnerwetter so ein Wetter.......!

Grüß Gott, liebe Leutla em Städtle ond dromrom!

Ma möchts ja et für möglich halta: Kaum isch richtig Sommer, hör i schon wieder de erschte Reklamationa. Ma bräucht jetzt Rega, ond was au onsre Baura macha sottat wenn ällas vertrocknat.

I moin, onsre Baura hent wega dera Zirn-Pleite andre Sorga. Se frogat sich nämlich, wo se eigentlich ihr Getreide jetzt noliefra könnat ond warom se ihran ...

... Kunschtdünger jetzt zwoimol zahla müaßat - letscht Johr em geführnei em Herbscht ond jetzt no amol für heuer. Bloß bei de Banka hörsch ja wieder amol nex. Entweder hent dia zu lang zuaguckt oder zu spät kalte Füaß kriagt. Es isch halt emmer wieder des gleiche: De letschte beißt dr Hond.

Aber warom solls de Baura anders ond besser ganga wia de Laubfrösch em Ried. Aus den Augen, aus dem Sinn...! Kaum hat ma nämlich ällas omweltmäßig ond für dia Stadtrandstroß grichtat, hört ma bloß no domme Sprüch ond mancherlei sogar hämische Bemerkunga. I moin, was viele, au onsre Leut en Giengen, mit Agendagruppa ond au sonscht an Arbeit neigsteckt hent, hat meh verdient wia a Stammtischgschwätz von sotte, wo no lebtag über ihran Tellerrand et nausguckt hent. Dia brauchat wahrscheinlich wirklich koi Stadtrandstoß - dene roicht dr oigane Horizont vielleicht grad no oms nächschte Hauseck nom.

I woiß scho, dass mir derzeitig klamm send mit am Geld ond i woiß au, dass dia Stroß no a Weile dauert. Aber au onser Entwicklung von onserer Stadt dauert hoffentlich no viele Jährla, ond zwar et bloß bis an des besagte nächschte Hauseck nom moint dr Stadtrat Jörg Ehrlinger als

Euer Karle Knitz von der Tanzlaube